Nastavljena potraga za nestalom djevojčicom
Izvor: Vijesti
Autor: Siniša Luković
Potraga za osmogodišnjom djevojčicom Kjarom koja je sinoć nestala na području Kavča u Kotoru, nastavljena je jutros od šest sati ujutro.
Za djevojčicom kojoj se od ponedjeljka predveče kada je posljednji put viđena kod prostorija MZ Kavač, gubi svaki trag, tragaju profesionalni i dobrovoljni vatrogasci iz Kotora i Tivta i više desetina građana.
Potraga je bila obustavljena sinoć oko 2 sata i nastavljena je jutros na zoru, ali je otežava jaka kiša koja već satima pada u Boki.
Djevočica je obučena kao na fotografiji.
Kako piše Kotor TV, ona govori engleski jezik.
-Molimo građane da ukoliko primijete dijete slično opisu kontaktiraju policiju na broj 122 ili vatrogasce na broj 123-prenosi Kotor TV..
Prema riječima komandira Službe zaštite Tivta Miodraga Giljače, svi uključeni u akciju čine maksimalne napore da nađu djevojčicu, ali za sada nema ni traga ni glasa ni od djevojčice, ni od psa koji je navodno, sa njom.
Djevojčica se navodno, nije predveče vratila kući, dok su to učinila sva druga lokalna djeca sa kojima se ona igrala. Njeni roditelji su je prvo sami pokušali pronaći, a kada u tome nisu uspjeli, pozvali su policiju i vatrogasce.
Pripadnici Službe zaštite Tivta poziv su dobili oko 20 časova od kada su se pridružili kolegama iz Kotora u akciji pretrage terena u Kavču.
Na terenu su i pripadnici dobrovoljnih vatrogasnih društava "Krtoli", "Tivat" i "Boka".
*Fotografija: FB
- Tagovi:
- Kotor
- Služba zaštite
- Potraga
